1 patay 9 pari, 16 kawani ng seminaryo nagpositibo sa COVID-19
MANILA, Philippines — Isang pari ang naiulat na nasawi sa COVID- 19 matapos magpositibo ang siyam sa kanila at 16 kawani ng seminaryo sa Quezon City.
Kaya pansamantalang isinara ang Christ the King Mission Seminary na matatagpuan sa E. Rodriguez Avenue, Quezon City.
Ayon sa Quezon City Epidemiology and Disease Surveillance Unit (QCESU), halos kalahati ng populasyon ng seminaryo ay infected ng virus.
Sinabi ni QCESU Chief Dr. Rolando Cruz, ang pasilidad na may populasyon na 59 katao at ang 34 dito na nasuri ay negative sa virus at ang 25 ay nagpositibo kabilang ang 9 na pari at 16 na empleyado.
Sa ulat ng QCESU, nitong September 18, ang 11 sa nagpositibo ay gumaling habang 13 ay nananatiling active ang kaso at isang pari ang namatay.
Nilinaw ni Cruz na sa loob ng seminaryo ay naroon ang Villa Cristo Rey at Fininman Building na naisailalim sa Special Concern Lockdown (SCL) mula September 18.
Sa ngayon ay apat ng religious facilities ang naka-lockdown dahil sa hawaan sa virus. Ang tatlo ay ang Stella Maris Convent (mula September 10), Religious of the Virgin Mary (September 14), at Convent of the Holy Spirit (September 15).
- Latest