Duterte kay Gordon: Tama na ang pamumulitika mo!
MANILA, Philippines — Binuweltahan muli ni Pangulong Rodrigo Duterte si Sen. Richard Gordon at sinabihan na tama na ang ginagawa nitong pamumulitika.
Anya, sawa na ang tao sa style ni Gordon at nasagot na lahat ng isyu tungkol sa sinasabing overpriced na medical supplies katulad ng face mask, face shield at iba pang personal protective equipment (PPEs).
“Nasagot na namin lahat. Tama na ang pamumulitika mo. Sawa na ang mga tao sa style ninyo. Magtrabaho na lang kami. Ito naman dapat talaga ang isyu diyan: Mayroon bang overpricing? Sabi ng COA wala. Mayroon bang ghost deliveries? Sabi ng COA wala. Ano pa ang gusto mong hanapin? Magsabi ka para malaman namin, mahanap namin kung ano ‘yung hinahanap mo,” ani Duterte.
Sinabi rin ni Duterte na sabihin lamang ni Gordon kung ano pa ang kulang dahil nagiging witch-hunt na ang imbestigasyon ng Senate Blue Ribbon Committee.
Nauna rito, muling ipinaliwanag ng Pangulo na naging mabilisan ang pagbili ng mga PPEs dahil mayroong pandemya at kailangang bilisan ng gobyerno ang kilos.
Ayon pa kay Duterte, kulang ang suplay noong nagsisimula pa lamang ang pandemya at kailangang protektahan ang buhay ng mga health workers.
Binanggit din ng Pangulo na mabuti pa ang mga senador na mga nakaupo lamang at batikusin ang gobyerno kapag mabagal ang kilos.
- Latest