Hawaan ng COVID-19 sa Metro Manila, bumaba pa - OCTA
MANILA, Philippines — Tuluyan pang bumaba ang reproduction rate ng COVID sa Metro Manila.
Kaugnay nito, naniniwala ang OCTA Research group na ang pinakamataas na bilang ng mga kaso ng COVID-19 o ‘peak’ nito ay posibleng naabot na nitong nakaraang linggo ng National Capital Region (NCR) kaya’t dapat na mapanatili naman ang patuloy na pagbaba nito.
Ayon kay OCTA Research fellow Dr. Guido David nitong Sabado, bumaba na aniya ang reproduction rate o hawaan sa Metro Manila na nasa 1.22 na lamang ang naitala subalit kailangang panatalihin naman ang pagsisikap na maipatupad ang mga pag-iingat upang hindi na umakyat pa ang bilang ng mga kaso.
“Early indications are that the surge may have already peaked in the NCR, but efforts must be sustained to ensure the trend continues downward,” ani Guido.
Gayunman, hindi pa naman ito makukumpirma dahil may mga backlog pa na dapat alamin.
Sa pag-aanalisa sa trend, ang mga kaso ng COVID-19 sa NCR ngayong taon, sinabi ng OCTA group na bukod sa pagbaba ng COVID-19 reproduction number, bumaba na rin ang positivity rate ng rehiyon sa 24% o mga nagpopositibo.
Samantala, kinontra naman ito ng Department of Health (DOH) na nagsabing sa kanilang pag-analisa hindi pa naabot ang ‘peak’ ng virus at posible pa itong tumaas. - Ludy Bermudo
- Latest