Bebot nilikida sa Pasay
MANILA, Philippines — Bulagta ang isang hindi pa nakikilalang babae makaraang pagbabarilin ng hindi pa nakikilalang suspect sa Pasay City, kahapon ng hapon.
Wala pang pagkakakilanlan sa biktimang inilarawan sa edad na 25-30, 5’2 ang taas, may tattoo sa kanang hita, nakasuot ng stripes na sando at orange na shorts.
Mabilis namang nakatakas ang salarin na isang lalaking armado ng ’di pa tukoy na kalibre ng baril.
Sa inisyal na ulat ng Pasay City Police, Sub-Station 3, dakong alas- 12:30 ng hapon ng Setyembre 18 (Sabado) nang maganap ang pamamaril sa O.C Laurel Street sa panulukan ng Decena St., Barangay 96, Pasay City.
Nakatayo umano ang biktima nang bigla na lamang barilin ng nag-iisang salarin na mabilis din namang tumakas.
Ayon din sa inisyal na imbestigasyon, hindi kakilala at hindi residente ng lugar ang biktima at posibleng may kaugnayan sa ilegal na droga ang krimen.
Patuloy pang iniimbestigahan ang insidente.
- Latest
