Lalaki patay sa baril ng kaibigang pulis

MANILA, Philippines — Namatay habang ginagamot sa ospital ang isang 31-anyos na lalaki matapos umanong aksidenteng mabaril ng kaibigang pulis habang silay ay nagkukuwentuhan matapos ang kanilang inuman, kamakalawa ng gabi.

Kinilala ang nasawi na si Jayson Capistrano, binata, delivery rider, at nakatira sa No. 2851 P. Fronda Street, Gagalangin, Tondo.

Kusang-loob namang sumuko sa Raxabago Police Station 1 ang suspek na si PCpl Oliver Ferrer, 31, binata, nakatalaga sa naturang istasyon at nakatira sa Malaya Street, Balut, Tondo.

Sa ulat ng pulisya, alas-10:45 ng gabi ay katatapos lang mag-inuman ng grupo ng suspek at biktima at nagkukuwentuhan na lamang sa likuran ng barangay hall ng Brgy. 183.

Habang nag-uusap, binunot ni Ferrer ang kaniyang baril, at pabirong itinutok sa biktima na bigla namang pumutok.

Nabatid na magkaibigan umano ang biktima at suspek habang wala ring pagtatalo na naganap bago ang pagputok ng baril.

Ang pulis ay nakatakdang sampahan ng kasong homicide.