Duterte inatasan si Solgen Calida na ipa-audit ang PRC sa COA

MANILA, Philippines — Para agad na masi­mulan ang pagbulatlat sa financial records ng Philippine Red Cross (PRC) ay inatasan ni Pangulong Rodrigo Roa Duterte si Solicitor General Jose Calida na kaagad na maghain ng request letter sa Commission on Audit (COA).

“The next step would really be the letter to be delivered to the COA by Solicitor General Calida regarding my request to audit the Red Cross,” ayon kay Pangulong Duterte sa kanyang Talk to the People.

Nauna rito, sinabi ng Malacañang na ang pondong ibinayad ng pamahalaan sa PRC para sa pagsasagawa ng COVID-19 tests ay “subject” sa COA audit.

Sinang-ayunan naman ni COA chair Aguinaldo ang naging pahayag na ito ng Pangulo.

Ang PRC ay pinamumunuan ni Sen. Richard Gordon na tumatayong chairman ng Senate Blue Ribbon Committee at nag-iimbestiga sa diumano’y overpriced na face mask, face shield, at iba pang gamit ng mga medical workers pangontra sa COVID-19.

Tinawag ni Pangulong Duterte na pathological storyteller si Gordon dahil wala itong ginawa kundi dumaldal nang dumaldal sa senate hearing dahilan kaya’t hindi na nakakapagsalita at nakakapagpaliwanag ng maayos ang mga inimbitahan nitong resource persons.

“Susmaryosep Gordon hindi mo ako matakot not in a million years. Hindi ako kawatan kagaya mo. Wala akong Red Cross na ginagatasan araw-araw. It’s not my style,” wika ni Duterte.