Fiberxers buhay pa!
MANILA, Philippines — Nasa krusyal na bahagi na ng elimination round at hindi na dapat matalo ang Converge.
Humataw si Dave Murrell ng 21 points para tulungan ang FiberXers sa 112-108 paggiba sa NLEX Road Warriors at palakasin ang pag-asa sa quarterfinals ng 2022 PBA Philippine Cup kahapon sa Smart Araneta Coliseum.
Nag-ambag si Tyrus Hill ng 18 markers at may 15, 11 at 10 points sina Taylor Browne, Justin Arana at Maverick Ahanmisi, ayon sa pagkakasunod.
“This is the last stretch of the eliminations and at this point regardless of our standings, we’re still in control of our destiny,” wika ni coach Jeffrey Cariaso sa Converge na pinutol ang dalawang sunod na kamalasan para sa 3-5 baraha.
Kumamada naman si Kris Rosales ng 29 points kasama ang pitong triples para sa ikalawang dikit na kabiguan ng NLEX na nahulog sa 4-4 marka.
Nagdagdag si Kevin Alas ng 23 markers, 8 rebounds at 7 assists habang may 18, 15 at 12 points sina Don Trollano, Justin Chua at Calvin Oftana, ayon sa pagkakasunod.
Mula sa 23-23 pagkakatabla ay kumawala ang FiberXers sa second quarter para itayo ang 43-21 kalamangan bago nakadikit ang Road Warriors sa third period, 76-77.
Isang 21-6 atake ang inilunsad ng Converge sa final canto sa likod nina Murrell, Taylor, Browne at Arana para ilista ang 16-point lead, 98-82, sa huling 5:02 minuto nito.
Hindi na nakabangon ang NLEX nang maiwanan sa 97-110 sa nalalabing 1:24 minuto.
- Latest
