SSC-R puntirya ang semis spot
MANILA, Philippines — Ilalabas na ng San Sebastian College-Recoletos ang buong puwersa nito upang masiguro ang pag-entra sa Final Four ng NCAA Season 97 women’s volleyball tournament sa pagpapatuloy ng aksyon ngayong araw sa Paco Arena sa Maynila.
Subalit daraan muna ang Lady Stags sa butas ng karayom dahil kailangan nitong masawata ang Lyceum of the Philippines University sa kanilang salpukan sa alas-2:30 ng hapon.
Bago ang Lady Stags-Lady Pirates games, masisilayan mula ang engkuwentro ng San Beda University at Jose Rizal University sa alas-12 ng tanghali.
Hawak ng San Sebastian ang ikatlong posisyon taglay ang 5-2 baraha sa ilalim ng nangungunang College of Saint Benilde (8-0) at defending champion Arellano University (7-1).
Nauna nang nakapasok sa Final Four ang Lady Blazers at Lady Chiefs.
At kung mananalo ang Lady Stags laban sa Lady Pirates, awtomatiko itong papasok sa semis dahilan para maiwan sa mga nalalabing teams ang bakbakan para sa huling silya sa Final Four.
Kaya naman inaasahang ibubuhos na ng San Sebastian ang buong puwersa nito para masiguro ang pag-entra sa next round.
Magkasalo sa ikalimang puwesto ang Lyceum at Jose Rizal hawak ang parehong 3-4 marka.
- Latest