PBA D-League hahataw na
MANILA, Philippines — Magkakasubukan ang Wangs Basketball-Letran at Adalem Construction-St. Clare sa pagsisimula ng 2022 PBA D-League Aspirants Cup ngayong araw sa Smart Araneta Coliseum.
Nakatakda ang salpukan ng Knights at Saints sa alas-10:30 ng umaga na susundan naman ng duwelo ng Centro Escolar University at AMA Online sa alas-12:30 ng umaga.
Parehong hari ang Letran at St. Clare sa kani-kanyang liga.
Nagkampeon ang Knights sa nakalipas na NCAA Season 97 men’s basketball tournament habang namayagpag naman ang Saints sa NAASCU men’s basketball tournament.
Ipaparada ng Wangs-Letran si veteran guard Fran Yu ngunit tatapatan ito ng Adalem Construction-St. Clare sa ngalan ni Johnsherick Estrada.
Maliban sa Letran at St. Clare, ang iba pang teams sa kumperensiyang ito ay ang EcoOil-La Salle, Builders Warehouse-UST, Apex Fuel-San Sebastian at Marinerong Pilipino.
Ang anim na mangungunang koponan matapos ang eliminasyon ang papasok sa playoffs.
Ang Top 2 teams ay awtomatikong uusad sa semis habang ang matitirang apat ay maglalaban sa playoffs para sa huling dalawang tiket sa semis.
Lalaruin ang mga laro tuwing Martes sa Ynares Sports Arena sa Pasig City sa oras na 11 ng umaga, ala-una ng hapon at alas-3 ng hapon.
- Latest
