Gilas dumating na sa New Zealand
Para sa third window ng Asian Qualifiers
MANILA, Philippines — Dumating na sa Auckland, New Zealand ang Gilas Pilipinas kahapon para sa pinal na preparasyon bago sagupain ang host team sa third window ng 2023 FIBA World Cup Asian Qualifiers sa Eventfinda Stadium.
Pinangunahan ni coach Nenad Vucinic ang Gilas delegation kasama sina assistant coaches Jong Uichico at Goldwin Monteverde.
Namuno sa 11-man roster ng Gilas sina Kiefer Ravena, RJ Abarrientos, SJ Belangel, Rhenz Abando, Geo Chiu, Lebron Lopez, William Navarro, Kevin Quiambao, Dwight Ramos, Carl Tamayo at Dave Ildefonso.
Kulang ang Nationals dahil sa injury ni naturalized player Ange Kouame (meniscal sprain at partial ACL tear) bilang ika-12 miyembro sana ng koponan.
Sa kabila nito, nangako si Vucinic ng palabang kampanya at magkakaroon ng ilang araw na paghahanda sa Auckland.
Bukas sasalang ang Gilas sa alas-3:30 ng hapon (Manila time) para sa misyong maiganti ang 63-88 kabiguan nila sa New Zealand noong Pebrero sa Smart Araneta Coliseum.
Pagkatapos ng laro ay lilipad agad pauwi ang Gilas para naman maghanda kontra sa India sa Hulyo 3 sa MOA Arena sa Pasay City.
May 1-1 baraha ang Gilas na hangad makaulit sa India matapos ang 88-64 panalo sa Manila window.
Wala pang galos ang New Zealand sa 3-0 kartada sa Group A, may 0-3 baraha ang India habang disqualified naman ang South Korea dahil sa kabiguang makapagpadala ng koponan noong nakaraang window dahil sa COVID-19 issues.
Bahagi na lamang ng preparasyon ng Gilas ang idinaraos na Asian Qualifiers dahil pasok na ito sa mismong 2023 FIBA World Cup bilang main host.
- Latest
