Hotshots umiskor ng back-t0-back wins
MANILA, Philippines — Hindi naging problema para sa Magnolia ang paglalaro na wala sina injured guard Paul Lee at suspended forward Calvin Abueva.
Dumiretso ang Hotshots sa kanilang ikalawang sunod na ratsada matapos talunin ang Phoenix Fuel Masters, 95-77, sa PBA Philippine Cup kahapon sa MOA Arena sa Pasay City.
Naglista si Mark Barroca ng 21 points, 6 assists, 5 steals at 5 rebounds para sa 3-3 baraha ng Magnolia at pinigilan ang two-game winning run ng Phoenix (2-3).
“Sabi nga ni coach (Chito Victolero) sa amin, lima naman kaming maglalaro eh, kahit wala iyong mga key players namin,” ani Barroca. “Nag-focus talaga kami sa depensa.”
Nagdagdag si Aries Dionisio ng 19 markers tampok ang apat na triples.
Binuksan ng Hotshots ang laro sa 11-0 patungo sa pagtatayo ng 21-point lead, 40-19, mula sa triple ni Barroca sa 3:02 minuto ng second period.
Lalo pang nabaon ang Fuel Masters sa 27-54 sa 8:46 minuto ng third quarter matapos ang fastbreak basket ni Dionisio.
Ang layup ni Sangalang ang nagbigay sa Magnolia ng komportableng 91-72 kalamangan sa huling 2:36 minuto ng final canto na hindi na naibaba ng Phoenix.
Samantala, sinolo ng Barangay Ginebra (4-1) ang liderato matapos itakas ang 75-72 panalo sa San Miguel (3-1) para sa kanilang ikalawang sunod na arangkada.
Naglista si Christian Standhardinger ng 20 points, 10 rebounds, 5 assists at 4 steals para sa Gin Kings.
- Latest
