Rivero sa Taiwan maglalaro
MANILA, Philippines — Dadalhin ni Ricci Rivero ang talento nito sa Taiwan matapos pumirma ng kontrata sa Taoyuan Pilots na naglalaro sa Taiwan P.League.
Si Rivero ang kauna-unahang Pinoy cager na maglalaro bilang world import sa Taiwan.
Napili ng 6-foot-1 player ang Taiwan sa kabila ng kaliwa’t kanang offers mula sa iba’t ibang teams sa Japan B.League at Korean Basketball League.
Sa katunayan, matagal nang nililigawan ng Taoyuan si Rivero.
“I simply gave so much value to persistence. Taoyuan was around since the decision to go pro came into the picture. They remained consistent on appreciating my value as a player and how they’re putting their trust in Filipinos,” ani Rivero.
Galing si Rivero sa matagumpay na kampanya sa UAAP Season 84 men’s basketball tournament kung saan tinulungan nito ang University of the Philippines na makopo ang kampeonato.
Nagtala si Rivero ng average na 13.52 points kada laro sa nakalipas na season ng UAAP.
Nakatakdang tumulak si Rivero patungong Taiwan sa Oktubre para makasama ang buong team sa kampanya nito.
Hangad ni Rivero na makatulong sa kampanya ng Taoyuan sa liga.
Nais nitong bumuo ng magandang chemistry sa kanyang mga teammates upang magkaroon ng magandang resulta ang kanyang unang taon na paglalaro sa abroad.
- Latest