Mapua kumana ng 3rd win
MANILA, Philippines — Solidong depensa ang naging armas ng Mapua University upang itakas ang pahirapang 20-25, 25-22, 25-23, 13-25, 15-12 panalo laban sa University of Perpetual Help System Dalta kahapon sa NCAA Season 97 women’s volleyball tournament sa Paco Arena sa Maynila.
Nagsilbing lider ng Lady Cardinals si Nicole Ong nang manduhan nito ang opensa at depensa matapos humataw ng 21 puntos tampok ang 13 attacks.
Kumana pa si Ong ng walong blocks para manduhan ang net defense ng kanilang tropa.
Naibulsa ng Mapua ang ikatlong panalo upang sumulong sa 3-1 marka.
Nakasosyo ng Lady Cardinals sa ikalawang puwesto ang defending champion Arellano University at San Sebastian College-Recoletos na parehong may 3-1 kartada.
Matinding bakbakan ang nasilayan sa buong panahon ng laban partikular na sa fifth set.
Naitarak ng Lady Cardinals ang 10-6 kalamangan sa huling kanto ng laban ngunit hindi agad bumitiw ang Lady Altas nang maitabla nito ang iskor sa 10-all.
Subalit dalawang sunod na errors ang nagawa ng Perpetual Help na sinabayan ng atake nina Ong at Carla Gaudan para makalayo sa 14-11 tungo sa panalo.
Naputol naman ang winning run ng Lady Altas na bumagsak sa 2-2 marka.
- Latest