Gilas iiwas mapingasan ng Malaysia
MANILA, Philippines — Lalapit ng isang hakbang mula sa matagumpay na gold medal defense ang Gilas Pilipinas men’s at women’s team kontra sa magkaibang katunggali sa umiinit na 31st Southeast Asian Games sa Thanh Tri Gymnasium sa Hanoi, Vietnam.
Sasagupain ng Gilas men’s ang Malaysia sa alas-11 ng umaga (Manila time) pagkatapos ng duwelo ng Gilas women’s kontra sa Singapore sa alas-9 ng umaga.
Parehong wala pang galos ang Philippine teams. May 4-0 baraha ang men’s habang 3-0 naman sa women’s bilang reigning gold medalists ng SEA Games basketball.
Kagagaling lang ng Gilas men’s sa 88-60 panalo kontra sa host na Vietnam matapos daigin ang Thailand, 76-73, Cambodia, 100-32 at Singapore, 88-37.
Dominante rin ang Gilas women’s na pinataob ang Indonesia, 93-77, Thailand, 97-81 at Vietnam, 118-87.
Kung magwawagi uli ngayon ay isang panalo nalang ang kailangan ng parehong koponan upang masiguro ang dalawang gintong medalya para sa Pilipinas.
Sa men’s team ay pakay nila ang ika-14 na sunod at ika-19 na kabuuang gold medal habang ikalawang sunod naman sa women’s team.
Sasandal uli si Gilas men’s coach Chot Reyes kina June Mar Fajardo, Matthew Wright, RR Pogoy, Kiefer Ravena, Thirdy Ravena, Troy Rosario at teen sensation Lebron Lopez upang giyahan ang atake kontra Malaysia, na may 2-2 kartada.
- Latest
