7-sunod na ratsada na ang Phoenix

PHOENIX — Dumiretso ang NBA-leading Suns sa kanilang pang-pitong sunod na ratsada matapos talunin ang Utah Jazz, 115-109, tampok ang 33 points ni Devin Booker.

Dinuplika ng Phoenix, lider din sa Western Conference, ang kanilang NBA-best record na 37-9 noong 2006-2007 season para sa best start sa franchise history.

Sa pamumuno ni Booker ay kinuha ng Suns ang 48-35 abante sa second period hanggang maagaw ng Jazz (30-18) ang 91-86 kalamangan sa kaagahan ng fourth quarter.

Isang 20-5 atake ang pinamunuan nina Booker at Chris Paul na nagbigay sa Phoenix ng 11-point lead, 111-100, sa huling 3:23 minuto ng laro para tuluyan nang iwanan ang Utah na nasa No. 4 spot sa West.

Tumapos si Paul na may season-high 27 points, 14 assists at 9 rebounds para sa Suns na naglaro na wala sina injured guard Cameron Payne, center Deandre Ayton at forward Jae Crowder.

Wala naman sa lineup ng Jazz ang mga may injury na sina Donovan Mitchell, Rudy Gobert, Mike Conley, Bojan Bogdanovic, Joe Ingles at Royce O’Neale.

Sa Oklahoma City, humakot si center Nicola Vucevic ng 26 points at 15 rebounds para igiya ang Chicago Bulls (29-17) sa 111-110 pagtakas sa Thunder (14-33).

Ang mintis na 3-point attempt ni Oklahoma City guard Shai Gilgeous-Alexander sa huling 2.3 segundo ang sumelyo sa panalo ng Chicago.

Sa Cleveland, tumipa si veteran forward Kevin Love ng 20 points tampok ang tatlong triples sa 95-93 pag-eskapo ng Cavaliers (29-19) sa New York Knicks (23-25).

Nag-ambag si Darius Garland ng 13 markers at 12 assists para sa ikalawang sunod na panalo ng Cleveland.

Sa New Orleans, kumamada si Devonte’ Graham ng 25 points at nagdagdag si Josh Hart ng 22 points at 10 rebounds sa 117-113 paggupo ng Pelicans (18-28) sa Indiana Pacers (17-31).