Warriors nakalusot kahit masama ang shooting ni Curry

SAN FRANCISCO — Umiskor si Jordan Poole ng 20 points para sa 94-92 paglusot ng Golden State sa Utah Jazz, 94-92 sa larong masama ang three-point shooting ni Stephen Curry.

Tumapos si Curry na may 13 markers sa likod ng mahinang 1-of-13 clip sa 3-point range para sa ikalawang dikit na ratsada ng Warriors (34-13) upang manatili sa No. 2 spot sa NBA at Western Conference sa ilalim ng Phoenix Suns (36-9).

Nagtuwang sina Poole, guard Damion Lee at center Kevon Looney sa fourth quarter para matakasan ng Golden State ang Utah.

Tumipa si Lee ng 12 markers galing sa apat niyang triples at may 10 points si Looney tampok ang 3-point play sa huling 1:48 minuto ng laro.

Nagkaroon ng tsansa ang Jazz (30-17) na maagaw ang panalo kundi lamang nagmintis si Bojan Bogdanovic ang kanyang tres at tip-in ni Royce O’Neale sa pagtunog ng final buzzer.

Sa Miami, kumolekta si Jimmy Butler ng 20 points, 10 rebounds at 12 assists para sa kanyang ika-10 triple-double ngayong season sa 113-107 pagtusta ng Heat (30-17) sa Los Angeles Lakers (23-24).

Inagaw ng Miami ang No. 1 spot sa Eastern Conference kasunod ang Brooklyn Nets (29-17) at Chicago Bulls (28-17).

Sa San Antonio, humakot si Joel Embiid ng 38 points at 12 rebounds sa 115-109 paggupo ng Philadelphia 76ers (27-19) sa Spurs (17-30).

Sa Boston, nagpasabog si Jayson Tatum ng 51 points para igiya ang Celtics (24-24) sa 116-87 pagdaig sa Wizards (23-24).

Sa Dallas, kumolekta si Luka Doncic ng 37 points, 11 rebounds at 9 assists at nagsumite si Kristaps Porzingis ng 15 points, 8 boards at season-best 6 blocks sa 104-91 pananaig ng Mavericks (27-20) sa Memphis Grizzlies (32-17).