Magsayo handang labanan kahit sino

MANILA, Philippines — Bukas na bukas ang pintuan ni World Boxing Council (WBC) featherweight champion Mark Magsayo sa sinumang magnanais lumaban sa kanya maging ang rematch kay dethroned champion Gary Russell Jr.

Bilang isang kampeon, handa si Magsayo na patunayan ang bagsik nito sinuman ang haharap sa kanya para sa isang title defense o unification bout.

“But I’m willing to fight anybody now. I’m a champion now,” ani Magsayo.

Sariwa pa si Magsayo sa matagumpay na pag-agaw sa korona ni Russell matapos kubrahin ang majority decision win noong Linggo sa Borgata Atlantic City sa New Jersey.

Kaya naman agad na nagsulputan ang usap-usapan sa rematch lalo pa’t sumabak sa laban si Russell na may iniindang injury.

“I believe I have a torn tendon in my right shoulder. I haven’t competed in almost two years. But this is what champions do. I wanna step into the ring regardless of the injury and whatnot,” ani Russell.

Mismong si Russell na ang nagpahayag na handa itong muling harapin si Magsayo sa isang rematch kung papayag ang kampo ng Pinoy champion.

“Hell yeah (I want a rematch). Will he want a rematch? That’s the question. I’d rematch him,” ani Russell.

Ipinauubaya naman ni Magsayo ang lahat sa MP Promotions na siyang nakikipagnegosasyon sa kanyang mga laban. “It’s up to Sir Sean Gibbons and my promotions. It’s up to them,” aniya.

Sa ngayon, lutang pa ang isip ni Magsayo dahil natupad na ang pangarap nitong maging world champion.

Nais ni Magsayo na ibahagi ang kanyang tagumpay sa lahat ng mga sumuporta at nagtiwala sa kanyang kakayahan.