Bulanadi kailangan munang lumaro sa Gilas

MANILA, Philippines — Nais ng Samahang Basketbol ng Pilipinas (SBP) na maglaro muna si Allyn Bulanadi sa Gilas Pilipinas na sasabak sa FIBA World Cup Qualifiers sa Pebrero.

Pagkatapos ng qualifiers, saka lamang ire-release ng SBP si Bulanadi upang makasama ang mother team nitong Alaska Aces sa PBA Govenors’ Cup.

Ito ang kinumpirma ni Danny Espiritu na agent ni Bulanadi. “Nire-requets ng SBP na maglaro muna si Allyn sa February window bago siya irelease sa PBA,” aniya.

Isa si Bulanadi sa limang players na naka-kontrata sa SBP bilang bahagi ng Gilas Pilipinas.

Hinugot siya ng Alaska Aces bilang fourth pick sa Gilas Pilipinas special draft may tatlong taon na ang nakalilipas.

Kasama ni Bulanadi sina Isaac Go (Terrafirma), Rey Suerte (Blackwater), Matt Nieto (NLEX) at Mike Nieto (Rain or Shine).

Matatapos na ang kontrata ng Gilas Draftees sa Enero 31. Gaganapin naman ang first window ng FIBA World Cup Qualifiers sa Pebrero 24-28 sa Smart Araneta Coliseum.

Subalit posible pang mabago ang lahat depende sa magiging sitwasyon ng bansa ilang linggo bago ang naturang petsa.

Sa kasalukuyan, bumababa na ang bilang ng mga tinatamaan ng coronavirus disease (COVID-19) sa National Capital Region (NCR) na magiging venue ng qualifiers ngunit tumataas naman ang kaso sa iba’t ibang probinsiya.

Hindi nakapaglaro si Bulanadi sa second window ng FIBA Asia Cup Qualifiers noong 2022.