PSC may pondo para sa kampanya ng Philippines Team sa Vietnam SEA Games

MANILA, Philippines — May inilaan nang pondo ang Philippine Sports Commission (PSC) para sa pagsabak ng mga national athletes sa darating na 31st Southeast Asian Games sa Hanoi, Vietnam.

Ito ang sinabi kahapon ni PSC Commissioner Celia Kiram sa kanyang pagdalo sa Tabloids Organization in Philippine Sports (TOPS) Usapang Sports via Zoom.

Pondong P200 mil-yon ang inilatag ng sports agency para sa mga equipments, training expenses at exposures ng mga atleta bilang preparasyon sa Hanoi SEA Games na nakatakda sa Mayo 12-23.

May nakalaan ding P50 milyon para naman sa tournament proper kabilang na ang mga travel expenses, equipments at allowances ng Team Philippines.

“Hindi kami nagkulang sa PSC sa pagsuporta sa ating mga atleta. We didn’t remissed on our duties and responsibilities,” ani Kiram sa TOPS na pinamumunuan ng bagong presidente nitong si Beth Repizo-Marana ng Pilipino Star Ngayon. “Hopefully, ganoon din ang ating mga atleta.”

Idedepensa ng Pinas ang overall cham-pionship sa Hanoi SEA Games na nakamit ng bansa na naging host ng biennial meet noong 2019.

Humakot ang mga Pinoy athletes ng kabuuang 149 gold, 117 silver at 121 bronze medals para dominahin ang nasabing SEA Games edition.

“This coming SEA Games kumpiyansa ako sa kakayahan ng ating mga atleta. But for sure hindi ganoon katindi ang impact, simply because of the issue of COVID-19,” wika ni Kiram.