Hidilyn sa Rizal ang training

MANILA, Philippines — Dahil nasa Alert Level 3 ang National Capital Region (NCR) ay magte-training si Tokyo Olympics gold medalist Hidilyn Diaz sa Rizal Province para paghandaan ang mga lalahukang torneo.

Balak sana ni Diaz na magbalik-ensayo sa Rizal Memorial Sports Complex sa Manila City na bubuksan dapat ng Philippine Sports Commission (PSC) noong Enero 10 para sa ilang national athletes. Ngunit dahil sa pagsirit ng mga kaso ng coronavirus disease (COVID-19) bunga ng Omicron variant ay nadiskaril ito.

“Dahil nandito kami sa Maynila hindi ako nakaka-training nang maaayos tsaka delikado, so pupunta kami ng Rizal at doon kami magte-training,” ani Diaz na sasamahan ng kanyang boyfriend/coach na si Julius Naranjo. “Parang backyard training din kagaya ng ginawa namin sa Malaysia.”

Na-lockdown rin sina Diaz at Naranjo kasama si Chinese coach Gao Kaiwen sa Malaysia dahil sa COVID-19 pandemic noong 2020 at napilitang magsanay sa garahe ng isang Malaysian weightlifting official.

Ang resulta nito ay ang pagrereyna ng 30-anyos na si Diaz sa women’s 55-kilogram division sa Tokyo Games at ang pagbuhat sa kauna-unahang Olympic gold medal ng Pinas matapos ang 97-taong paghihintay.

“Kailangan naming maghanap ng paraan, hindi puwede na dahil walang mapagte-trainingan dito na lang kami. Hindi! Ha-hanap kami ng paraan para makapag-training,” wika ni Diaz na target makalaro sa 2024 Paris Olympics.

Kasalukuyang naka-quarantine ang tubong Zamboanga City matapos magpositibo sa COVID-19 bagama’t naturukan na ng booster shot noong Enero 4.

Inalis na ang women’s 55kg class para sa 2024 Paris Olympics kaya bababa si Diaz sa 49kg category na dating dinomina ni Chinese lifter Hou Zhihui.