Petecio, Paalam, Marcial kaya pa sa 2024 Paris Olympics

MANILA, Philippines — Hindi inaalis sa isip nina Olympian boxing medalists Nesthy Petecio, Carlo Paalam at Eumir Marcial ang Olympic gold sa 2024 Paris Games.

“Pinapangarap ko talaga gold medal sa Olympics,” sabi ni Paalam saginanap na turnover ceremony ng house and lot nila nina Petecio at Marcial sa Tagaytay City.

Ang 125-square-meter  na bahay at lupa  mula kay Philippine Olympic Committee (POC) president Abraham Tolentino at kapatid na Sen. Francis Tolentino ay ibinigay kina Petecio, Paalam at Marical sa pagkapanalo ng silver, silver at bronze medals, ayon sa pagkakasunod sa nakaraang Tokyo Olympics.

Si weightlifter Hidilyn Diaz, inihatid ang kauna-unahang Olympic gold, ay binigyan naman ng mas malaking 220-square-meter na house and lot.

Sa tatlong boxers, si Paalam ang malaki ang tsansang manalo ng Olympic gold sa Paris dahil siya ang pinakabata sa edad na 23. Si Marcial ay 26, si Petecio ay 29.

Sinabi naman ni Marcial, isasabay ang kanyang pagiging professional boxer sa pagiging bahagi ng national team habang naka-enlist sa Air Force, na may ibubuga pa siya.

“Kaya pa,” pahayag ni Marcial.

HInikayat ni Tolentino ang tatlong boxers gayundin si Diaz na subukan pang maka-isa sa Paris Olympics.

“I think they can still do qualify in the Olympics and they’re still young enough to shoot for the Olympic gold,” sabi ng congressman mula sa Tagaytay at PhilCycling chief.