Casimero handa na sa title defense
MANILA, Philippines — Handa na ang lahat para sa title defense ni reigning World Boxing Organization (WBO) bantamweight champion John Riel Casimero sa Disyembre 11 sa Dubai, United Arab Emirates.
Nakatakdang magtungo sa Dubai ngayon ang team ni Casimero para sa laban nito kay mandatory challenger Paul Butler sa Coca-Cola Arena.
Kasama ni Casimero sa delegasyon sina dating world champion Manny Melchor, Stephen Lunas at kapatid na si Jayson.
Sumailalim si Casimero sa matinding training camp para masiguro na nasa perpektong kundisyon ito bago sumalang sa laban.
Kitang-kita na ang matikas na porma ng pangangatawan ni Casimero kung saan lutang na lutang na ang bagsik ng kamao nito na gagamitin sa kanyang laban kay Butler.
Kasado na rin ang game plan ni Casimero para masiguro ang panalo.
Isang impresibong panalo ang target masikwat ni Casimero upang lalong lumakas ang tsansang makuha nito ang isang blockbuster fight sa susunod na taon.
Target ni Casimero na maisaayos ang unification bout laban kay Japanese fighter Naoya Inoue na nagmamay-ari ng World Boxing Association (WBA) at International Boxing Federation (IBF) belts.
Matagal nang pinupuntirya ni Casimero si Inoue na tinawag nitong Japanese turtle.
Subalit nabago ang lahat nang ipag-utos ng WBO ang mandatory title defense ni Casimero laban kay Butlter.
Maliban kay Casimero, sasabak din sa Dubai sina four-division world champion Donnie Nietes at Jayson Mama.
Makakasagupa ni Nietes si Norberto Jimenez ng Dominican Republic habang haharapin ni Mama si Sunny Edwards ng Great Britain.
- Latest
