Suns dinuplika ang franchise record sa paggiba sa Warriors

PHOENIX — Kumamada si center Deandre Ayton ng 24 points para sa pagduplika ng Suns sa kanilang franchise record na 17 sunod na panalo matapos talunin ang Gol­den State Warriors, 104-96.

Nagawa ito ng Phoenix sa kabila ng pagka­wala ni star guard Devin Booker sa second quarter dahil sa kanyang left hamstring injury.

Sa kabila nito ay na­gawa pa rin ng Suns (18-3) na kunin ang 80-78 abante laban sa Warriors (18-3) papasok ng fourth quarter patungo sa pakikipagsosyo sa liderato sa NBA at sa Wes­tern Conference.

Nagdagdag si guard Chris Paul ng 15 points at 11 assists para sa Phoenix na unang nagposte ng 17-game winning streak noong 2006-07 season.

Pinamunuan ni Jordan Poole ang Golden State sa kanyang 28 points.

Sa Sacramento, humataw si Anthony Davis ng 25 points sa 117-92 paggupo ng Los Angeles Lakers (12-11) sa Kings (8-14) bagama’t hindi naglaro si LeBron James.

Inilagay si James sa NBA health and safety protocol.

Sa New York, isinalpak ni James Johnson ang dalawang free throws sa huling 2.2 segundo para tulungan ang Brooklyn Nets (15-6) na maitakas ang 112-110 panalo sa Knicks (11-10).

Kumolekta si James Harden ng 34 points, 10 rebounds at 8 assists at may 27 markers si Kevin Durant para sa patuloy na pamumuno ng Nets sa Eastern Conference.

Sa Toronto, umiskor si Jaren Jackson Jr. ng 25 points sa 98-91 paggupo ng Memphis Grizzlies (11-10) sa Raptors (9-13).