Bolts sasandal kay Bishop
MANILA, Philippines — Hindi siya kasing bagsik ni dating NBA player Shabazz Muhammad, ngunit maaasahan ng Meralco si import Tony Bishop para sa darating na 2021 PBA Governors Cup na didribol sa Disyembre 8 sa Ynares Sports Arena sa Pasig City.
“Tony Bishop is not Shabazz Muhammad. Shabazz is more of a wingman, a guy who could score a lot of points,” pagkukumpara ni Black kina Bishop at Muhammad sa panayam sa sports program na “The Game”.
Hindi natuloy ang paglalaro ng dating UCLA standout at five-year NBA veteran para sa Bolts dahil sa personal emergency.
Ang 29-anyos namang si Bishop ay tatlong posisyon ang maaaring laruan.
“Tony Bishop is more of a guy who can play the 5, 4, or 3 position depending on what type of team he is playing on. He gets a lot of rebound and can guard the big man positions,” ani Black sa Panamanian-American.
“So he kind of fills what we need a little more than what maybe Shabazz would have because he can play the inside game,” dagdag ng one-time PBA Grand Slam champion.
Tatlong beses naging runner-up ang Meralco sa Barangay Ginebra, binabanderahan ni import Justin Brownlee, sa huling apat na Finals ng PBA Governors Cup.
Kumpiyansa si Black na makakamit na nila ang inaasam na kauna-unahang PBA championship sa likod ni Bishop.
Bukod kina Bishop at Brownlee ay sasalang din sa PBA Governor’s Cup sina KJ McDaniels (NLEX), Olu Ashaolu (Alaska), McKenzie Moore (TNT Tropang Giga), Paul Harris (Phoenix), Brandon Brown (San Miguel), Cameron Forte (NorthPort), Antonio Hester (Terrafirma), Henry Walker (Rain or Shine), Jaylen Bond (Blackwater) at Mike Harris (Magnolia).
Kasama ni Bishop sa mga bagong mukha sa PBA sina Moore, Hester, Bond at Forte.
- Latest