Heading may kontrata pa sa Gilas, ‘di pa puwede sa Taiwan

MANILA, Philippines — Nilinaw ng Samahang Basketbol ng Pilipinas na mayroong “live legal contract” si Jordan Heading sa pederasyon at sa Gilas Pilipinas kasunod ng ulat na maglalaro ito sa T1 league ng Taiwan.

Ayon sa SBP, ang kontrata ay hanggang Marso ng 2023 na ipinarating na rin nila sa FIBA at sa Chinese Taipei Basketball Association sa pamamagitan ng pormal na liham.

“We have formally written FIBA and the Chinese Taipei Basketball Association in connection with the reported playing in Taiwan for the Taichung Suns of Mr. Jordan Timothy Heading and have informed them that Mr. Heading has a live legal contract with the SBP until March 2023,” anang SBP sa opisyal na pahayag. “Until we hear from FIBA, please bear with us if we have no further comment in the meantime.”

Noong Miyerkules ay inanunsyo ng Taichung na maglalaro sa kanila si Heading sa papara-ting na season ng bagong tayong T1 league. Siya sana ang ikatlong Pinoy doon kasunod nina Jason Brickman (Kaohsiung Poseidon Aquas) at Caelan Tiongson (Taoyuan Leopards).

Subalit matatandaang bahagi si Heading ng special Gilas class ng 2021 PBA Rookie Draft noong Marso matapos mapili bilang No. 1 overall pick ng Terrafirma.

Habang hindi pa nag-lalaro sa PBA ay nasa poder muna ng SBP si Heading kasama ang iba pang special draftees na sina Will Navarro, Tzaddy Rangel at Jaydee Tungcab bilang bahagi ng Gilas core na ihina-handa para sa 2023 FIBA World Cup.

Nauna nang sumalang si Heading sa Gilas sa huling window ng FIBA Asia Cup Qualifiers sa Clark, Pampanga at FIBA Olympic Qualifying Tournament sa Belgrade, Serbia.

Sa Pebrero 2022 ang susunod na laro ni Heading at ng Gilas sa pagsisimula ng 2023 FIBA World Cup Asian Qualifiers.