Herro nagpakabayani para sa Miami

MIAMI — Nagpa-putok si Tyler Herro ng 27 points sa loob ng 24 minuto mula sa bench at may 21 markers si Jimmy Butler sa paggiya sa Heat sa 137-95 paglampaso sa NBA champion na Milwaukee Bucks.

Humakot si center Bam Adebayo ng 20 points at 13 rebounds para sa Miami na nagtala ng team records para sa opening night scoring at opening night margin of victory.

Ang naunang team record for points ng Heat sa isang opener ay 128 points laban sa Detroit Pistons noong 1999 at ang biggest margin of victory ay 26 points kontra sa Orlando Magic noong 2000.

Nalimitahan si Gian-nis Antetokounmpo sa 15 points para sa Bucks at may 14 markers si Grayson Allen.

Tumipa ang Olympic gold medalist na si Khris Middleton ng 10 points mula sa mahinang 4-for-14 fieldgoal shooting para sa Milwaukee na naglaro na wala sina Jrue Holiday (right heel), Brook Lopez (back) at Bobby Portis (left hamstring).

Sa San Francisco, nalampasan ng Golden State Warriors ang pagbangon ng Clippers mula sa 22-point deficit sa first half para tangayin ang 115-113 panalo.

Naglista si Stephen Curry ng 45 points tampok ang walong triples para sa ikalawang sunod na ratsada ng Warriors matapos talunin ang LA Lakers kamakalawa.

Humataw si Paul George ng 29 points sa panig ng Clippers.

Sa Atlanta, umiskor si Cam Reddish ng 20 points kasunod ang 19 markers ni Trae Young sa 113-87 pagdagit ng Hawks kay Luka Doncic at sa Dallas Mavericks.

Kumolekta si Doncic ng 18 points, 11 rebounds at 7 assists sa panig ng Mavericks at may 17 markers si Jalen Brunson.