Tropang Giga 2-0 ang asinta

MANILA, Philippines — Tiyak na sasamantalahin ng TNT Tropang Giga ang hawak na momentum sa tangkang pagpoposte ng 2-0 lead sa kanilang best-of-seven championship series ng Magnolia.

Nirapido ng Tropang Giga ang Hotshots, 88-70, sa Game One ng 2021 PBA Philippine Cup Finals noong Miyerkules kung saan nagtayo sila ng 32-point lead sa third quarter.

“For us, all we’ve done is get the first game. We have to focus now our energy to prepare for Game Two,” wika ni TNT head coach Chot Reyes sa kanilang duwelo ng Magnolia ni mentor Chito Victolero ngayong alas-6 ng gabi sa Don Honorio Ventura State University Gym sa Bacolor, Pampanga.

Sa nasabing panalo ng Tropang Giga sa series opener ay kumolekta si rookie guard Mikey Williams ng 21 points, 10 rebounds, 5 assists at 2 steals.

“I just want to come in and be aggressive and just try to pick and choose my spots, just continue to do what I’ve done all year,” wika ng No. 4 overall pick ng TNT sa nakaraang PBA Rookie Draft.

Bukod kay Williams, muli ring sasandigan ng Tropang Giga sina RR Pogoy, Troy Rosario, Jayson Castro, Poy Erram at Ryan Reyes katapat sina Paul Lee, Ian Sangalang, Calvin Abueva, Mark Barroca at Jio Jalalon ng Hotshots.

Tumapos si Lee, may shoulder injury, ng team-high na 12 points sa panig ng Magnolia, habang 10 minuto lamang naglaro ang 6-foot-7 na si Sangalang sa first half dahil sa kanyang back spasms.

Ang mga injury nina Lee at Sangalang ay ga-ling sa semifinals series nila ng Meralco.

“Laban lang,” sambit ng 32-anyos na si Lee, ang tinaguriang “Angas ng Tondo” sa layunin ng Hotshots na makatabla sa Tropang Giga.

Nagkaroon naman si TNT forward Kelly Williams ng back injury sa gitna ng third period at kaagad dinala sa malapit na ospital.