Jazz pinatumba ang Thunder

SALT LAKE CITY — Tumipa si Bojan Bogdanovic ng 22 points at humakot si center Rudy Gobert ng 16 markers at 21 rebounds para banderahan ang Utah Jazz sa 107-86 pagpapatumba sa Oklahoma City Thunder.

Anim pang players ang umiskor ng double figures para sa season-opening win ng Jazz, nakahugot kay Fil-Am Jordan Clarkson ng 18 points at 16 markers kay Donovan Mitchell.

Umiskor si Clarkson ng 10 points sa second quarter para ibigay sa Utah ang 43-24 abante sa first half patungo sa 66-43 pag-iwan sa Oklahoma City.

Binanderahan ni Shai Gilgeous-Alexander ang Thunder sa kanyang 18 points kasunod ang 15 markers ni Darius Bazley.

Sa New Orleans, kumolekta si big man Joel Embiid ng 22 points at 12 rebounds at may 22 markers si Furkan Korkmaz tampok ang apat na 3-pointers sa fourth quarter sa 117-97 panalo ng Philadelphia 76ers sa Pelicans.

Pinatawan ng 76ers ng one-game suspension si forward Ben Simmons, habang hindi naglaro para sa Pelicans si star power forward Zion Williamson na inoperahan. Tumipa si Brandon Ingram ng 25 points para  sa New Orleans kasunod ang 23 markers ni Nickeil Alexander-Walker.

Sa Detroit, humugot si Zach LaVine ng 15 sa kanyang 34 points sa third quarter sa 94-88 paggupo ng Chicago Bulls sa Pistons.

Nag-ambag si DeMar DeRozan ng 17 points para sa Bulls at may 15 at 12 markers sina Nikola Vucevic at Lonzo Ball, ayon sa pagkakasunod. May 24 points si Jerami Grant para sa Pistons kasunod ang 13 markers ni Saddiq Bey.