Warriors wagi sa LA Lakers super team

NEW YORK — Ginulat ng Golden State Warriors ang super team na Los Angeles Lakers habang maganda naman ang panimula ng Milwaukee Bucks para sa kanilang title defense sa pagbubukas ng NBA season 2021-22 kahapon.

Sa Los Angeles, kumamada si Stephen Curry ng 21 points kasunod ang 20 markers ni Jordan Poole sa 121-114 paggupo ng Warriors sa Lakers.

Bumangon ang Warriors mula sa 10-point deficit sa dulo ng third period para talunin ang Lakers na ibinandera sina veteran Russell Westbrook, Carmelo Anthony, Rajon Rondo, Dwight Howard at DeAndre Jordan.

Binanderahan ni LeBron James ang Lakers sa itinala niyang 34 points at 11 rebounds, at kumolekta si Anthony Davis ng 30 points at 11 boards sa panig ng Lakers. Wala nang iba pang Lakers player na umiskor ng double figures.

Sa Milwaukee, humataw si Giannis Anteto-kounmpo ng 32 points, 14 rebounds at 7 assists para banderahan ang Bucks sa 127-104 paglampaso sa Brooklyn Nets.

Bago ang laro ay ibinigay muna ng NBA ang championship rings sa mga Milwaukee players, coaching staff, team officials at owners at ang pagtataas ng kanilang championship banner matapos ang 50 taon.

“You can walk away from the game today and that banner is always going to be there,” ani Antetokounmpo. “You can always come back and watch a game in 2055 -- hopefully we are alive -- and the banner is going to be there.”

Nagdagdag sina Khris Middleton at Pat Connaughton ng tig-20 points para sa Bucks at may 12 markers si Jrue Holiday na hindi nakalaro sa second half dahil sa bruised right heel.

Pinamunuan ni Kevin Durant ang Nets sa kanyang 32 points at 11 rebounds at may 21 at 20 markers sina Patty Mills at James Harden, ayon sa pagkakasunod.

Hindi naglaro para sa Brooklyn si star guard Kyrie Irving na ayaw magpabakuna laban sa COVID-19.