Simula na ang laban ng Gilas Women’s sa FIBA Asia Cup
MANILA, Philippines — Sasagupain ng Gilas Pilipinas women’s team ang bigating China bilang unang hamon nito sa pagsisimula ng 2021 FIBA Women’s Asia Cup sa Prince Hamza Hall sa Amman, Jordan ngayon.
Underdog ang mga Filipina ballers sa labang nakatakda sa alas-9 ng gabi (Manila time) kontra sa paboritong China na runner-up noong 2019 edition na ginanap sa India.
Bukod doon, pumang-lima rin ang mga Chinese sa katatapos lang na 2020 Tokyo Olympics kaya’t siguradong hindi magiging madali ang misyon ng Nationals.
“The quality of competition is very high especially against Olympic teams like China (and Australia) but the girls are ready to compete,” ani coach Pat Aquino.
Upang magawa ito ay sasandal si Aquino sa firepower ng pinaghalong bata at beteranong koponan sa pangunguna ni US NCAA standout Ella Fajardo at team captaib na si Janine Pontejos.
Aalalay sa kanila sina Afril Bernardino, Camille Clarin, Chack Cabinbin, Khate Castillo, Ria Nabalan, Mar Prado, Andrea Tongco at Kristine Cayabyab habang sina Clare Castro at Karl Ann Pingol ang tatao sa loob sa pagkawala ni Jack Animam.
Hindi makakalaro ngayon ang long-time Gilas anchor na si Animam bunsod ng kanyang pro-league stint sa Serbia para sa Radnicki Kragujevac.
Haharang sa kanilang daan ang powerhouse roster ng China na babanderahan ng 6-foot-9 na si Xu Han matapos mapasama sa Mythical Five ng Asia Cup noong 2019 edition.
- Latest
