Ginebra sa No. 8

MANILA, Philippines — Tuluyan nang inangkin ng nagdedepensang Barangay Ginebra ang huling tiket sa quarterfinal round matapos patalsikin ang Phoenix, 95-85, sa kanilang playoff sa 2021 PBA Philippine Cup kahapon sa Don Honorio Ventura State University Gym sa Bacolor, Pampanga.

Bilang No. 8 team ay sasagupain ng Gin Kings ang No. 1 TNT Tropang Giga, may dalang ‘twice-to-beat’ advantage sa quarterfinals, para sa kanilang rematch matapos magtuos sa nakaraang PBA Finals ng All-Filipino sa Clark bubble na pinagharian ng mga bataan ni coach Tim Cone.

“Our guys decided to keep going. Hopefully, we can take that attitude in the next game against TNT,” wika ni Cone. “We’re gonna go out there and see what we can do.”

Kailangan ng ‘never-say-die’ team na manalo ng dalawang beses sa Tropang Giga para makapasok sa best-of-seven semifinals series.

Sukbit din ng No. 2 Meralco Bolts ang parehong bentahe laban sa No. 7 NLEX Road Warriors.

Tumipa si Prince Caperal ng 19 points, habang may 17, 15 at 13 markers sina Stanley Pringle, Christian Standhardinger at Jared Dillinger, ayon sa pagkakasunod.

Itinala ng Ginebra ang 81-66 bentahe sa pagbubukas ng fourth period.

Ang running jumper ni Aljon Mariano ang nagbigay sa Gin Kings ng 17-point advantage, 90-73, sa huling 4:35 minuto ng laban bago nakadikit ang Fuel Masters sa 85-92 sa huling 2:12 minuto.

Ganap namang sinel-yuhan nina Standhardinger at Mariano ang panalo ng Ginebra.

Samantala, sisimulan ng No. 3 Magnolia at No. 6 Rain or Shine at ng No. 4 San Miguel at No. 5 NorthPort ang kani-kanilang best-of-three quarterfinals series.