Casimero inutusan ng WBO na labanan si Butler
MANILA, Philippines — Inutusan ng World Boxing Organization (WBO) na makasagupa ni WBO bantamweight champion John Riel Casimero si mandatory challenger Paul Butler sa kanyang title defense.
Ito ang inilabas na statement ng WBO kung saan walang magagawa si Casimero kundi ang sumunod sa naturang kautusan ng world governing body.
Naiparating na ng WBO ang desisyon nito sa kampo nina Casimero at Butler.
“The WBO World Championship Committee hereby orders the parties herein commencement of negotiations for the above-mentioned WBO Bantamweight Mandatory Championship Contest,” ayon sa sulat ni WBO championship committee Luis Batista-Salas.
Kaya naman inaasahang agad na sisimulan ang negosasyon upang maikasa na ang laban.
Binigyan ng 20 araw sina Casimero at Butler para maisaayos ang laban.
“Please be advised that the parties have twenty (20) days upon receipt of this letter to reach an agreement,” ayon pa sa sulat.
Kung hindi mapaplantsa ng dalawang kampo ang Casimero-Butler fight, daraan ito sa Purse Bid para desisyunan ang laban.
“If an accord is not reached within the time frame set forth herein, a Purse Bid will be ordered pursuant to WBO Regulations of World Championship Contests,” saad pa sa sulat ng WBO.
Dahil dito, tuluyan nang nagsara ang pintuan sa posibleng pagtutuos nina Casimero at WBC bantamweight champion Nonito “The Filipino Flash” Donaire.
Nauna nang ipinag-utos ng WBC na makalaban ni Donaire si mandatory challenger Reymart Gaballo sa kanyang title defense.
Matapos ang maiinit na bangayan sa social media, nagkaayos na sina Donaire at Casimero sa pag-asang maikasa ang unification bout.
Subalit hindi na ito matutuloy lalo pa’t ang WBO at WBC na ang nag-utos sa kanilang title defense.
- Latest