Donaire, Casimero ‘di pa tapos ang bangayan

MANILA, Philippines — Pinagpipiyestahan sa social media ang bangayan nina World Boxing Organization (WBO) bantamweight champion John Riel Casimero at World Boxing Council (WBC) bantamweight king Nonito “The Filipino Flash” Donaire.

Binanatan ni Donaire si Casimero na hanggang salita lamang ito dahil ayaw niyang pumirma sa kontrata para sana sa isang unification bout.

Sinabi ni Donaire na tila natatakot si Casimero na pumirma dahil ayaw nitong sumailalim sa VADA (Voluntary Anti-Doping Association) test.

Ngunit hindi basta-basta nagpakabog si Casimero.

Sa resbak nito, nilinaw niyang wala pa itong natatanggap na kontrata mula sa kampo ni Donaire.

Ayon pa kay Casimero, babalik ito sa Amerika at umaasa itong mismong si Donaire ang lalapit sa kanya para tuluyang maikasa ang laban.

“Nonito Donaire Jr. malapit na akong pumunta diyan sa US. ‘Yan ang hinihintay ko, ikaw ang lumapit sa akin. Wala pa talaga akong natanggap na papel o kontrata galing sayo,” ani Casimero sa kanyang post sa social media.

Nanindigan din si Casimero na wala itong inaatrasang laban.

“Wala akong inaayawan na laban. Bisaya ni Bai. Kung pumirma na lang kesa puro dada sa social media. Ikasa na agad nang magkaalaman,” ani Casimero.

Idinaan naman sa biro ni Donaire ang sagot nito.

“Can’t make this crap up. He wants me to hand deliver the contract to him? Does he want flowers and chocolates too?” ani Donaire.