Pacquiao pasok pa rin sa Top 5 ng Ring Magazine

MANILA, Philippines — Bagama’t natalo sa kanyang huling laban, nananatiling mataas ang rating ni eight-division world champion Manny Pacquiao sa listahan ng Ring Magazine.

Pasok pa rin sa Top 5 si Pacquiao matapos okupahan ang ikalimang puwesto sa kanyang dibisyon.

Nangunguna si World Boxing Council (WBC) at International Boxing Fede-ration (IBF) welterweight champion Errol Spence Jr. sa kabila ng kabiguang nitong labanan si Pacquiao dahil sa kanyang eye injury.

Pumapangalawa si World Boxing Organization (WBO) champion Terrence Crawford, ikatlo si reigning World Boxing Association (WBA) titlist Yordenis Ugas at pang-apat naman si Shawn Porter.

Galing si Pacquiao sa unanimous decision loss kay Ugas noong Agosto 21 (Agosto 22 sa Maynila) sa Las Vegas, Nevada.

Ngunit hindi ito nakaapekto nang husto sa puwesto ni Pacquiao kaya’t malinaw na isa pa rin ang Pinoy champion sa pinakamatikas na boksingero sa kanyang dibisyon.