Obiena nakabawi na

MANILA, Philippines — Imbes na ma-depress matapos ang nakakadismayang performance sa nakaraang Tokyo Olympics ay mas minabuti ni national pole vaulter Ernest John Obiena na bumawi.

Anim na bigating torneo ang nilahukan ng 6-foot-2 Pinoy pride matapos ang nasabing quadrennial event sa Japan noong Hulyo tampok ang dalawang beses niyang pagsira sa sariling Philippine record at ang pagbasag sa 23-year old Asian mark sa Golden Roof Challenge sa Austria noong nakaraang linggo.

“I needed to measure that I can actually pull this off and I want to have some sense of accomplishment with this season because the biggest competition was Tokyo and it wasn’t pleasant,” ani Obiena kahapon sa “Power & Play” program ni Noli Eala. “Therefore I really needed this badly.”

Sa nasabing event sa Austria ay lumundag ang 25-anyos na pole vaulter ng bagong national at Asian record na 5.93 meters para angkinin ang gold medal.

Malayung-malayo ito sa kanyang 11th place finish sa Tokyo Olympics kung saan siya nagtala ng 5.70m.

“I just needed to have some kind of sign that I’m actually capable, that I’m actually okay, I’m actually good, that I’m actually able to do all of this,” ani Obiena.

Inaprubahan na rin ng Philippine Sports Commission (PSC) ang cash incentives na P1.5 milyon para sa paglilista ni Obiena ng bagong national at Asian record.