Hidilyn, 10 pa sasabak sa World Championship sa December

MANILA, Philippines — Pangungunahan ni Tokyo Olympics gold medalist Hidilyn Diaz ang 11-man national team na sasabak sa World Weightlifting Championship sa Disyembre sa Tashkent, Uzbekistan.

Ang nasabing kompetisyon na nakatakda sa Dis-yembre 7-17 ang simula ng mga ilalatag na qualification tournaments para sa 2024 Paris Olympics.

Sasalang si Diaz sa women’s 55 kilogram category kung saan niya binuhat ang kauna-unahang Olympic gold medal ng Pinas sa Tokyo, Japan noong Hulyo.

Kasalukuyang abala ang tubong Zamboanga City sa ilang special guesting sa iba’t ibang probinsya bilang pagpaparangal sa kanyang tagumpay sa Tokyo Games.

Bukod sa 30-anyos na si Diaz ay lalahok din sa weightlifting championship si Tokyo Olympics campaigner Elreen Ando na bubuhat sa mas mababang 59kg class matapos lumaban sa 64kg division ng 2020 Olympiad.

Sa nasabing weight category tumapos si Ando sa se-venth place sa kabuuang 11 partisipante sa Tokyo Games.

Ang iba pang kasama sa delegasyon ay sina Margaret Colonia (64kg), Mary Flor Diaz (women’s 45kg), Elien Rose Perez (49kg) Kristel Macrohon (71kg) at Vanessa Sarno (76kg).

Bubuhat naman sa men’s division sina Fernando Agadin (55kg), John Febuar Ceniza (61kg), Dave Lloyd Pacaldo (67kg) at John Dexter Tabique (96kg).