EDITORYAL - PCG murag gubang plaka

Hangtud kanus-a hasion sa Chinese Coastguard ang mga Pilipinong mananagat sa kaugalingon niining tugkaran diha sa West Philippine Sea.  Ang mas dakong pangutana kun hain naman diay ang mga barko sa Philippine Coastguard anang mga panahona nga sila gikinahanglan?

Niadtong Enero 9 ning tuiga, dunay mikatap sa social media nga posts sa usa ka kapitan sa usa ka panagatan sa Pilipinas. Ang video nagpakita nga gigukod kini og barko sa Chinese Coastguard ug duna say nagsunod-sunod kanila nga rubber boat gikan sa maong barko.

Sumala pa sa maong kapitan, giduol sila sa maong barko samtang sila nanagat sa Ayungin Shoal, pagkahuman mi-deploy ang maong barko og rubber boat nga dunay mga personaheng sakay ug pugsanon silang giabog gikan sa ilang nahimutangan.

Wala pa gyud matagbaw, gisundan sila nga daw gisiguro nga di na sila mobalik pa. Ang Ayungin shoal naa sa sulod sa exclusive economic zone ug continental shelf sa Pilipinas.  Kun ang Department of Foreign Affairs pa maoy pasultihon, bugtong ang mga Pilipinong mananagat lamang ang dunay katungod sa lugar ug makakuha og bisan unsang gikinahanglan gikan sa maong dagat. Ang maong mananagat mi-report sa kadagkoan sa PCG, apan ang tubag, ilaha pang beripikahon ug himoan kini og report nga ilang iduso ngadto sa DFA alang sa posibleng pagduso og diplomatic protest.

Beripikahon, himoag report ug moduso og protesta. Pila naman ni ka dekadang tinubagan sa PCG?  Murag gubang plaka. Wala pa gyud diay ni mahurot nga linya sa tubag nga sa panahon pa man niadtong wala pay klarong mga barko ang PCG? Karon nga nahatagan na sila og mga barko (salamat kang P.Noy), mao ra gihapon ilang mahimo? Nagmika ra man ug pasinaw sa uniporme?

Asa man diay tong mga gipasiatab sa mga opisyales sa PCG dihang nangabot kining mga multi-role response vessels (MRRV) Parola Class, ang BRP Gabriela OPV, ang bag-ong coastguard cutters gikan sa Japan ug uban pang bag-ong sakyanang pangdagat?

Di ba miingon sila nga pinaagi niini mas mabuhat na nila ang ilang mandato ug mabatyagan na pirme ilang presensiya sa mga mananagat. Ngano man gyud matunong man panahon nga managat ang mga Pilipino sa WPS, wala gyuy barko sa PCG nga makabantay kanila?