Dili ka hugaw

Dear Tito Miguel ,

Ako diay si  Cerila,  taga Barangay Guadalupe, Cebu City . Permi ko sungogon sa akong barkada mga humok daw ko og ilong. Dali ra man gud ko madala sa mga pa-cute nga mensahe sa boys. Kapila nako gipaasa sa boys pero wala gihapon ko matagam, sige gihapon ko entertain basta naay moparamdam nako. Unsa ang angayan buhaton aron mawala ang kahumok sa akong ilong?  —CERILA

Cerila,

Tul-ira imong hiwi nga gituohan. Tingali nagtuo ka kinahanglan naa kay uyab aron makumpleto ka o aron dili ka mabiyaan sa biyahe. Mao na nga humok ka’g ilong kay nanaginot ka’g namasin nga ang nagparamdam maoy para kanimo giandam.

Paniid sa imong mga higala nga naay uyab, dili ba halos tanan mohilak, mahiubos ug masakitan kay gibakakan, gilingla o gibudhian? Ang ila gituohan nga naka patibuok mao ra say nibuak ug nihiwa kanila. Dili uyab ang mokumpleto nimo, kun dili ikaw mismo. Pamili sad, dili kay motuo dayon ka maski ni kinsa. Timan-i, walay lalaki nga manguyab unya ang isulti ngil-ad. Nagpa-cute gani. Ang tanan tam-is, sa pulong hamis. Apan mabarugan ba sa binuhatan? Wa ka kahibawo, nagka-ilhanay ni sila’g nagkahibaw-anay unsa ka kahumok, busa gisuwayan ka’g giduwaan.

Kun humok ka’g ilong, humok sad ka kuhaon. Dali ra ka biyaan kay wa man sila maglisod pagkab-ot nimo. Busa hatagi’g respeto imong pagkatawo, pugngi imong kaugalingon. Ang imong kinaham kasagaran dili maoy makapatagbaw sa imong gihinam-hinam. Lagmit sab nahadlok ka sila mahanaw kun magpalugit ka. Tinuod, anugon labi na’g gusto nimo. Apan buot pasabot dili pa sila seryoso kay ngano ni-surrender dayon nimo. Ang lalaki nga tiunay pursigido kay siya sigurado nakagusto. Ang mahanaw sa gamay nga bikil mura’g langaw, motugpa sa pagkaon nga kanila wala’y mobugaw. Paglikay sa langaw, ka’y dili ka hugaw. —Tito Miguel

Magpatambag ka? Ipada kang Tito Miguel: 0998-581-5856