Celtics buhi pa

CEBU, Philippines — Naka-angkon pa og laing kinabuhi ang Boston Celtics human gipabugnaw ang Miami Heat, 116-99, sa Game 4 sa ilang best-of-seven NBA Eastern Conference finals kagahapon didto sa Kaseya Center sa Miami, Florida.

Bukid pa hinoon gihapon ang tungason sa Celtics gumikan kay ang Heat labaw pa og duha ka duwa serye sa baraha nga 3-1.

Si Jayson Tatum mikadlit og 34 puntos ug 11 ka rebounds alang sa Celtics, nga mosuway paglugway sa ilang season og laing usa ka duwa sa Game 5 nga molabyog didto sa ilang korte karong Biyernes.

Bisan og wala pay team nga nakabangon human malubong og 3-0 sa usa ka serye sa kasaysayan sa NBA, si Tatum nagkanayon nga wala sila ma-presyur sa sitwasyon nga ilang nahimutangan karon.

Gani nagpabilin silang masaligon nga makahimo og usa ka dakong milagro ug mo-abante sa NBA Finals diin ang West champion Denver Nuggets nagpaabot.

“We weren’t thinking about winning four in a row tonight, we were just trying to save our season and win tonight and we did that,” matud pa ni Tatum.

Gawas ni Tatum, lain pang lima ka Celtics ang mihipos og double figures apil na si Jaylen Brown nga mitali og 16 puntos.

Ang Heat maoy mikontrola sa duwa sa first half apan wala na sila makarekober pa human gipabuthan og 16-0 nga bomba sa Celtics sa ikatulong kuwarter.

Si Jimmy Butler mitagak og 29 puntos alang sa Heat apan mipasud lamang og usa sa upat niya ka 3-pointers.

Sa kinatibuk-an, ang Heat naka-igo lamang og walo sa gitira nilang 32 ka tres. Sukwahi kaayo kini sa Celtics, nga milansang og 19 sa 45 nila ka 3-point shots.