Nuggets mi-sweep sa lakers abante sa NBA Finals sa labing unang higayon

CEBU, Philippines —  Giwani ni Nikola Jokic si LeBron James sa dihang gikumpleto sa Denver Nuggets ang dalaygon nilang 4-0 sweep batok sa Los Angeles Lakers aron langkaton ang Western Conference title nga naghatud kanila sa NBA Finals sa labing unang higayon sa kasaysayan sa ilang prangkisa.

Ang two-time MVP nga si Jokic mikolekta og triple-double alang sa Nuggets, nga madasigong mibangon human malubong og 15 puntos sa halftime dayon na ngadto sa pagpatikangkang sa Lakers sa hingpit, 113-111, kagahapon didto sa Crypto.com Arena.

"We don't give up," matud pa ni Jokic nga miharos og 30 puntos, 14 ka rebounds ug 13 ka assists. "I've been saying this for five years -- when we were bad or when we were good -- we don't give up. And that's what happened today."

Si Jamal Murray midugang og 25 puntos. Ang tanang starters sa Nuggets mikadlit og double figures timaan sa kalawamon ug kabalanse sa ilang puwersa.

Nindot unta kaayo ang salida ni James nga mipaulbo og 31 puntos sa first half aron ituboy ang Lakers ngadto sa 73-58 nga labaw human sa first half.

Apan si Jokic mipasilaob sa nagkayong resbak sa Nuggets sa ikatulong kuwarter diin siya mibubo og 13 puntos sa dihang ilang gilampaso ang Lakers, 36-16, aron balihon ang dagan sa duwa pabor kanila.

Gituldokan ni Jokic ang iyang pagkamabayanihon pinaagi sa pagpasud sa malisud niyang layup taliwala sa bagang depensa sa Lakers aron pagpa-abante sa Nuggets, 113-111, sa pinal nga 51.7 segundos.

Sa nahibiling kuwatro segundos, si James dunay katapusang tsansa nga makapuwersa og overtime apan ang iyang itsa natapalan ni Aaron Gordon dayong kapupos sa oras nga nakapalumpayat sa Nuggets sa tumang kalipay.

Ang 38-anyos nga si James mitapos uban ang 40 puntos, 10 ka rebounds ug siyam ka assists sa napakyas niyang tinguha nga salbaron ang Lakers. Ang Nuggets, usa sa 11 ka teams nga wala pa makadaog og korona sa NBA, makigharong batok sa Miami Heat o sa Boston Celtics sa finals.