AMA sibak sa Letran

MANILA, Philippines — Kumamada si Pao Javillonar ng 15 points habang may 14 markers at 10 rebounds si Kevin Santos para sa 71-57 pagsibak ng Wangs Basketball @27 Strikers-Letran sa AMA Online sa 2023 PBA D-League Aspirants’ Cup kahapon sa Filoil EcoOil Centre sa San Juan.

Ito ang ikalawang sunod na panalo ng Knights matapos ang 0-2 panimula sa torneo at ipinalasap sa Titans ang pang-limang dikit nitong kamalasan para tuluyan nang magbakasyon.

“Credits to the players for stepping up sa second half,” wika ni coach Rensy Bajar. “Nag-rely lang kami sa defense na gusto namin maging identity moving forward.”

Nag-ambag sina Kobe Monje at Neil Guariano ng tig-8 points at may 5 mar­kers, 7 rebounds at 5 assists si Kurt Reyson.

Kinuha ng AMA ang 42-35 abante sa pagsisimula ng third period bago humataw ang Letran ng isang 13-2 atake para agawin ang 48-44 kalamangan patungo sa 54-50 bentahe sa pagsasara nito.

Tuluyan nang nakalayo ang Knights sa fourth quarter para selyuhan ang panalo sa Titans.

Kumamada ng 20 points si Earl Ceniza at may 14 markers si Reed Baclig para banderahan ang AMA.