Heat 3-0 na sab: Usa ka daog na lang gikan sa NBA Finals

CEBU, Philippines — Ang Miami Heat mikastigo na sab sa Boston Celtics, 128-102, aron pagposte og 3-0 nga bentaha sa ilang best-of-seven NBA Eastern Conference finals kagahapon didto sa Kaseya Center sa Miami, Florida.

Mahimo nang langkaton sa Heat ang korona sa East kon ugaling ilang matiwasan ang Celtics sa Game 4 karong Miyerkules didto gihapon sa ilang korte.

Ang Heat naglaraw nga mamahimong ikaduha pa lamang nga eighth-seeded team sa kasaysayan nga nakatikang sa NBA Finals. Una kining nakab-ot sa New York Knicks niadto pang 1999.

Didto sa ilang balwarti, gipaluhod sa Heat ang karibal nilang Celtics bisan og ang alas nilang Jimmy Butler mihipos lamang og 16 puntos.

Salamat sa pagmangtas sa point guard nilang si Gabe Vincent, nga mipasud og 11 sa 14 niya ka itsa apil na ang unom ka tres dayon na ngadto sa pagkadlit og 29 puntos.

Mihimo sab og kasikas si Duncan Robinson uban ang 22 puntos ingon man sila si Caleb Martin ug Max Strus nga nagkumboya'g 28 puntos.

Wala na paginhawaa pa sa Heat ang Celtics sukad sila mikaratil ngadto sa 22 puntos nga labaw sa ikaduhang kuwarter, nga ila pang gipaburot ngadto sa 93-63 padung sa pinal nga 12 minutos sa aksiyon.

Sa kinatibuk-an, ang Heat miposa og 19 sa gitira nilang 39 ka 3-pointers.

Samtang ang Celtics nakaigo lamang og 11 sa gilabay nilang 42 ka tres.

Pareho sab nga mikagar ang opensa sa duha ka mga bitoon sa Celtics. Si Jayson Tatum nalimitahan ngadto lamang sa 14 puntos samtang si Jaylen Brown 12 puntos lamang ang nahimo.