Nuggets 3-0 na, nanuktok sa labing unang NBA Finals

CEBU, Philippines —  Si Jamal Murray mipabuto og 37 puntos uban ang pito ka rebounds ug unom ka assists sa dihang gilampaso sa Denver Nuggets ang Los Angeles Lakers, 119-108, aron pagpaduol ngadto sa usa na lang ka daog gikan sa labing unang NBA Finals sa kasaysayan sa ilang prangkisa.

Nanginit dayon si Murray pagsugod sa duwa dayon na ngadto sa pagkadlit og playoff record nga 30 puntos sa first half nga nahimong pundasyon sa Nuggets alang sa dalaygong kadaogan nga nakahatag kanila og 3-0 nga labaw batok sa Lakers sa ilang best-of-seven Western Conference finals series.

Sa kasaysayan sa NBA, wala pay team nga nakabangon human mahagba sa nag-unang tulo ka duwa sa usa ka serye.

Mahimo nang langkaton sa Nuggets ang korona sa Western Conference kon ugaling ilang matiwasan ang Lakers sa Game 4 karong Martes.

"We stayed with it," matud pa ni Murray. "We just had a hit first mentality that we've had through the playoffs. We kept them at a distance for most of the game. I just felt like we executed throughout the game and hit first."

Mismo si Lakers coach Darvin Ham miangkon nga ang sayong pagulbo sa opensa ni Murray maoy nakapasukarap kanila.

"He got off scorching. He's one of those players, man, once he starts to see them go in, it's just he catches fire, and he rolls them off pretty quickly, which he did in that first half," dason pa ni Ham kabahin ni Murray.  "Basically carried them offensively through that half."

Luyo sa sayong pagmangtas ni Murray nga mitali og 17 puntos sa unang kuwarter, ang Nuggets misutoy ngadto sa 24-10 nga labaw.

Nakagukod man tuod ang Lakers ug gani nakalabaw pa og usa ka lugas, 94-93, sa sayong bahin sa katapusang kuwarter apan mao ra kadto ang labing nindot nilang nahimo gumikan kay ang Nuggets miresbak pinaagi sa nagkayong 13-0 run aron kontrolahon og balik ang duwa sa hingpit.

Mihimo sab og kasikas si Nikola Jokic uban ang 24 puntos alang sa Nuggets, 15 niini iyang gibubo sa katapusang kuwarter nga nakabaraw sa tinguha sa Lakers nga makabawos didto sa ilang korte.

Si Anthony Davis maoy nangu sa Lakers uban ang 28 puntos samtang sila si LeBron James ug Austin Reaves mihipos og 23 puntos matag usa sa pilderong kawsa.