Butler nanginit

CEBU, Philippines — Si Jimmy Butler mipatuasik og 35 puntos ug ang nagkayo nilang opensiba sa ikatulong kuwarter mituboy sa Miami Heat ngadto sa 123-116 nga kadaogan batok sa Boston Celtics sa pasiunang duwa sa ilang best-of-seven NBA Eastern Conference finals kagahapon didto sa TD Garden sa Boston, Massachusetts.

Ang Heat nabiyaan og 13 puntos sa first half apan mipabuto og 46-25 nga bomba sa ikatulong kuwarter aron bughaon Celtics.

"We are just playing really good basketball. More than anything, we are staying together through the good and through the bad," buhagay pa ni Butler nga duna say lima ka rebounds, pito ka assists ug unom ka steals.

"It is a game of runs. We can talk to one another. I think that's what ultimately makes me smile is the fact when things are not going our way, we can look at each other eye to eye and know when somebody is messing around, and we can fix it," dugang pa ni Butler.

Gawas ni Butler, misalida sab si Bam Adebayo uban ang 20 puntos, walo ka rebounds ug lima ka assists ingon man sila si Max Strus, Gabe Vincent, Caleb Martin ug Kyle Lowry nga mi-iskor og dili mominus 15 puntos matag usa alang sa Heat.

Si Jayson Tatum mikadlit og 30 puntos apan nakahimo og duha ka krusyal nga turnovers sa naghinapos nga bahin sa duwa nga nakatampo sa pagkasukarap sa Celtics.

Ang Celtics miabli sa katapusang kuwarter pinaagi sa 7-0 run ug nakasikit ngadto na lang sa kuwatro puntos sa pinal nga 2:31 sa aksiyon apan sila si Martin ug Butler milansang og duha ka sagunson nga tres aron pagpaginhawa og lawom sa Heat bitbit ang 10 puntos sa nahibiling 63 segundos sa duwa.

"I thought the first half was good, and I thought we just let go of the rope in the third quarter, lost that sense of urgency," dason pa ni Celtics coach Joe Mazzulla.

Si Jaylen Brown mihipos og 22 puntos alang sa Celtics, nga mosuway pagtabla sa serye sa Game 2 karong Sabado didto gihapon sa ilang korte.

Dili hinoon gusto si Butler nga makabawos ang Celtics.

"We did our job tonight. But we've got another one to get in two days," pahimangno pa ni Butler.