Donling nakalingkawas batok Zynergia

CEBU, Philippines —  Nakalabang sa lawod sa kalisdanan ang haring gangis Donling Aircon and Refrigeration Services ug nidaog lang kini'g usa ka lugas batok sa Zynergia  78-77 sa Javier Ceramics Cup 2023 niadtong Domingo diha sa Ateneo de Cebu sa Mango Avenue, Cebu City.

Lupig og binatoay sa puntos ang Donling sa nag-unang tulo ka kuwarter ug nahimong kulbahinam ang duwa dihang nagpuli-puli kini'g ilog sa labaw sa fourth quarter. Nabaraw kini human matusak ang perimeter shot ni Andri Ravina sa katapusang 25 segundos sa fourth quarter, 78-77.

May purohan untang modaog ang Zynergia dihang ila ang bola sa katapusang singko segundos, apan ang inbound pass ni Rafraf Panares nailog ni Kenn Nunez nga nakahugno sa gipangandoy nilang daog.

Si Nunez mikulit og 17 puntos, samtang si Ravina adunay 13 puntos, apan si Roldan Daug nga maoy best player ang topscorer pinaagi sa iyang 18 puntos, walo ka rebounds ug tulo ka assists, si James Karl Lumoya miamot og 10 puntos sa Donling ni Romeo Quilaton Jr. nga nag-una sa standing uban ang 5-0 nga baraha ning maong liga nga giorganisar sa Brothers Ball League.

Ang 2-3 nga Zynergia ni Alvin Taneo gipangulohan ni Dan Cardenas uban ang 18 puntos, gisundan ni Panares nga dunay 13 puntos ug VM Cempron sa iyang 10 puntos.

Sa laing duwa, ang Cake and Memories milubong sa CJL Sniper, 74-59 aron moposte og 4-1 nga baraha.

Gipangulohan kini ni Zachary Bauntad pinaagi sa iyang 12 puntos, upat ka assists ug duha ka rebounds nga igo na alang kaniya aron tahuron isip best player of the game.

Sila si Roger Samande  ug Bennie Binondo mitampo'g 10 puntos matag usa alang sa team ni Allan Paris Caballes.

Ang CJL Sniper ni James Lapinid nga wala pa katiklo og daog sa lima ka duwa gipangulohan sab ni Nico Cojo sa iyang 18 puntos, gisundan ni Jimmy Fernan nga dunay 16 puntos.