Zynergia mitipi sa CJL Sniper, Cake and Memories daog sab
CEBU, Philippines — Nagkumbinar og 28 puntos sila si Dan Cardenas ug Melchor Almonicar alang sa Zynergia nga mitipi sa CJL Sniper, 63-56 sa Javier Ceramics Cup 2023 niadtong Domingo diha sa Ateneo de Cebu sa Mango Avenue, Cebu City.
Si Cardenas nga mikadlit og 16 puntos, upat ka rebounds ug upat sab ka assists maoy nangu sa opensa sa Zynergia ug mao sab ang best player of the game, samtang si Almonicar mipugnit og 12 puntos. Si Sean Tamase mitira og 10 puntos alang sa Zynergia ni Alvin Taneo nga aduna na'y 2-1 nga baraha.
Nangulo sa CJL mao si Jimmy Fernan pinaagi sa iyang 14 puntos, gisundan nilang Jade Nepomuceno, Zyriele Cabahug ug Nico Cojo nga miabay og 10 puntos matag usa.
Nagtangag sab og 2-1 nga baraha ang Cake and Memories human pildiha ang Goutsource Solutions International (GSI), 59-47 ubos sa pagpangulo sa best player niining si Rico Rosaroso nga mibagnos og 20 puntos, unom ka rebounds ug duha ka assists.
Laing miiskor og double figures sa team ni Allan Paris Caballes mao si Michael Daan sa iyang 17 puntos ug Roger Samande nga adunay 14 puntos.
Si Gilbert delos Reyes lang ang nakaabot og double digits sa iyang 10 puntos aron pangulohan ang GSI.
Ang GSI ni Ivan Llesol ug ang CJL ni James Lapinid napilit gihapon sa kinailawmang bahin sa standing sa managsama nilang baraha, 0-3 ning maong liga nga giorganisar sa Brothers Ball League.
- Latest
