JMD, Donling 3-0 na's Javier Ceramics Cup

CEBU, Philippines — Napanalipdan sa JMD Automotive ug sa Donling Aircon and Refrigeration Services ang limpiyo nilang record aron padayon nga saw-an ang liderato sa Javier Ceramics Cup 2023.

Apan managlahing dalan ang ilang gisubay kay ang JMD miagi og kulbahinam nga duwa batok sa Jot Trucking, 63-61, samtang ang Donling yano kaayong mipakaging sa JJS Electrical Supplies, 67-50 niadtong Domingo diha sa Ateneo de Cebu sa Mango Avenue, Cebu City.

Sakit kaayo ang kapildihan sa Jot Trucking kay sila ang naglabaw sa nag-unang tulo ka kuwarter ug naapsan na sila sa fourth period.

Gihatagan unta'g higayon ang Jot Trucking nga maka-overtime dihang dos puntos ra ang labaw sa JMD sa nahabiling otso segundos, 93-91, apan mikagar ang duha ka importanteng free throws ni Charlie Ocanada ug nakuha sa JMD ang rebound dayon kahurot sa oras.

Si Lucky Mendoza mao na usab ang topscorer ug best player of the game human mitimbre'g 20 puntos, unom ka rebounds ug lima ka assists.

Sila si Jomarie Jameskeo ug James Surita nitampo'g 13 ug 11 puntos matag usa alang sa team ni Gerald Dilao nga nagbitbit na karon og 3-0 nga baraha.

Ang 1-2 nga Jot Trucking gitimonan ni Romnick Romo pinaagi sa iyang 16 puntos, gisundan ni Ocanada nga dunay 13 puntos. Sila si Frits Enriquez ug Jeffrey Francisco nag-amotay og 10 puntos sa team ni Jeffrey Tagacanao.

Sa laing aksyon, ang Donling ni Romeo Quilaton Jr. nga adunay 3-0 record gipangulohan sa best player niining si Jessie Sanchez pinaagi sa iyang 16 puntos, walo ka rebounds ug  tulo ka assists, gisundan ni Roldan Daug sa iyang 14 puntos.

Duha sab ka JJS players ang naka-double digits sa pagpangulo ni Francis Bauntad sa iyang 18 puntos ug Clifford Busmion nga dunay 12 puntos.

Ang JJS ni Jeffrey Banaag aduna na karo'y 1-2 record ning maong liga nga giorganisar sa Brothers Ball League.