Matinding training gagawin ng Philippine beach handball team para sa world meet

MANILA, Philippines — Mahabang pagsasanay at preparasyon ang gagawin ng Philippine women’s beach handball team para sa pagsabak sa 2024 World Beach Handball Championship.

May sapat na panahon ang mga Pinay para mapaganda ang kanilang laro sa world meet na nakatakda sa Hulyo ng susunod na taon.

“Ibibigay namin our best to train and work hard. If our preparation in the Asian meet was short, dapat mas double pa dapat for the world,” ani playing coach Aurora Adriano kahapon sa Philippine Sportswriters Association (PSA) Forum sa conference room ng Rizal Memorial Sports Complex sa sesyon na inihandog ng San Miguel Corporation, Philippine Sports Commission,  MILO, Phi-lippine Olympic Committee at ng PAGCOR.

Kinuha ng national squad ang silver medal sa nakaraang 9th Asian Beach Handball Championship sa Bali, Indonesia para sa tiket sa world championship.

Makakasagupa ng mga Pinay sa world meet ang mga best beach handball teams ng Brazil, Scandinavia, Denmark, Hungary at iba pa.