TNT pinutol ang ratsada ng Converge
MANILA, Philippines — Tinapos ng TNT Tropang Giga ang apat na sunod na ratsada ng Converge matapos ikonekta ang 128-122 panalo sa 2023 PBA Governors’ Cup kahapon sa Smart Araneta Coliseum.
Nagpasabog si import Jalen Hudson ng game-high na 56 points tampok ang anim na three-point shots bukod sa 12 rebounds at 4 assists para sa 4-1 karta ng Tropang Giga.
“I’m just trying to be aggressive, that’s pretty much it. My teammates gave me enough confidence,” wika ni Hudson. “I know it’s a big game for us and for them as well.”
Namantsahan ang dating malinis na 4-0 record ng FibeXers na nakahugot kay import Jamaal Franklin ng 47 markers kasama ang siyam na triples.
Kaagad kumamada si Hudson ng 33 points sa first half para idikit ang TNT sa halftime, 64-65, hanggang agawin ang 109-104 abante sa 6:10 minuto ng fourth period mula sa 3-point play ni Varilla.
Lalo pang nabaon ang Converge sa 108-120 sa huling 2:28 minuto ng labanan matapos ang two-handed slam dunk ni Kelly Williams.
Sa ikalawang laro, isinalpak ni Jeremiah Gray ang krusyal na triple sa huling 17.8 segundo para tulungan ang nagdedepensang Barangay Ginebra sa 114-111 pagtakas sa NLEX.
Tumapos si Gray na may 19 points kasama ang limang tres habang nagtala si import Justin Brownlee ng 44 markers, 16 boards at 6 assists para sa 2-0 baraha ng Gin Kings.
- Latest
