Lillard nagsunog ng 60 pts kontra Jazz
PORTLAND, Ore. — Para kay Damian Lillard, madali lang umiskor ng 60 points laban sa Utah Jazz.
Nagpasabog si Lillard ng season-high na 60 markers tampok ang siyam na three-pointers para pamunuan ang 134-124 panalo ng Portland Trail Blazers kontra sa Jazz.
“I think any time you score 60 points it’s special, but I think this one I just felt like it came pretty simple,” ani Lillard na pinantayan ang 60 points ni Luka Doncic sa overtime win ng Dallas Mavericks sa New York Knicks noong Disyembre 27.
Hindi pa rin maungusan ang 71 points na ginawa ni Donovan Mitchell sa overtime game ng Cleveland Cavaliers sa Chicago Bulls noong Enero 3.
Nag-ambag si Jerami Grant ng 19 points para sa 23-25 record ng Portland.
Umiskor si center Lauri Markkanen ng 24 points para pamunuan ang Utah (25-26).
Ang magkasunod na slam dunk nina Grant at Anfernee Simons ang naglayo sa Blazers sa 121-110 na bigong maputol ng Jazz.
Sa Milwaukee, kumolekta si star forward Giannis Antetokounmpo ng 33 points at 14 rebounds para sa 107-99 paggupo ng Bucks (31-17) sa Denver Nuggets (34-15).
Sa San Francisco, ipinasok ni Jordan Poole ang kanyang winning layup sa huling segundo ng laro sa122-120 paglusot ng nagdedepensang Golden State Warriors (24-24) sa Memphis Grizzlies (31-17).
Sa Oklahoma City, naglista si guard Trae Young ng 33 points at 11 assists sa 137-132 pagdakma ng Atlanta Hawks (25-24) sa Thunder (23-25).
Sa Los Angeles, nagposte si Anthony Davis ng 21 points at may 12 markers ang bagong hugot na si Rui Hachimura sa 113-104 panalo ng Lakers (23-26) sa San Antonio Spurs (14-34).
Sa Sacramento, nagsumite si Pascal Siakam ng 26 points at 11 rebounds para sa 113-95 pagpulutan ng Toronto Raptors (22-27) sa Pacific Division-leading na Kings (27-20).
Sa Philadelphia, kumonekta si James Harden ng dalawang tres at isang layup sa huling apat na minuto ng laro sa 137-133 paglusot ng 76ers (31-16) sa Brooklyn Nets (29-18).
Sa Houston, tumipa si Kyle Kuzma ng 33 points sa 108-103 pagdaig ng Washington Wizards (22-26) sa Rockets (11-37).
- Latest